పోలీస్ ట్రైనింగుకి వెళుతూ వస్తున్నానోచ్

శరత్తు పోలీసు ఏంటా అని ఖంగారు పడకండి. సిటిజెన్ పోలీసింగ్ అని మా పట్టణంలో ఓ ప్రోగ్రాం వుంది. వారానికి మూడు గంటల చొప్పున తొమ్మిది వారాలు మా పోలీసు స్టేషను వారు ఆసక్తి చూపించిన వారిలో ఎన్నిక చేసిన పౌరులకు శిక్షణ ఇస్తారు. అందులో భాగంగా నిన్న మొదటి తరగతి జరిగింది. చాలా బాగా జరిగింది. మాది 32 వేలమంది వుండే చిన్న పట్టణమే అయినా కూడా దాదాపుగా 120 మంది పోలీసులు మా స్టేషనుకి వున్నారు. అందులోని అన్ని శాఖల అధిపతులు వచ్చి మాకు ఆహ్వానం చెప్పి, మాట్లాడి వెళ్ళారు.

మా స్టేషను గురించి పూర్తిగా వివరించారు. విభాగాలు, అధిపతులు, తేడాలు, సౌకర్యాలు, విధానాలు అన్నీ విడమరచి చెప్పారు. ఆ తరువాత ఓ ముప్పావు గంట సేపు స్టేషను అంతా తిప్పి చూపించారు. లోపల స్టేషన్ అంత పెద్దగా వుంటుందని అనుకోలేదు. చిన్న పట్టణానికే అంత పెద్ద పోలీసు స్టేషన్ వుండటం ఆశ్చర్యం అనిపించింది. ఇంకా పెద్ద పట్టణాలకు ఇంకెంత పెద్ద స్టేషనులు వుంటాయో కదా. ఎన్నో గదులు, ఎన్నో సౌకర్యాలు. లాకప్ సెల్స్ కూడా లొనికి వెళ్ళి చూసాము. ఫైరింగ్ రేంజ్ కూడా వుంది. మాకు ఫైరింగులో కూడా కాస్త శిక్షణ ఇస్తారుట కానీ కాల్చే అధికారాలు వుండవు లెండి. మాకు తిప్పి చూపించిన అధికారి SWAT టీం మెంబర్. ఆ టీం ఎలా పనిచేస్తుందో కూడా వివరించాడు.

శిక్షణలో భాగంగా ఒక రోజు నాలుగు గంటలు స్క్వాడ్ (పోలీస్) కారులో ఆఫీసు పక్కన కూర్చొని తిరిగి చూస్తూ అతని విధుల్లో సహకరించాల్సి వుంటుంది. వచ్చే వారం పోలీస్ కుక్కతో ప్రదర్శన వుంటుంది. నేరస్తులని పట్టుకోవడానికి పోలీసు కుక్కలు ఎలా ఉపయోగపడుతాయో వివరిస్తారు. అలా అలా ఒక్కో వారం ఒక్కో విశేషం వుంటుంది. తరగతులు అన్నీ పూర్తి చేసాక ఇష్టమయితే పౌర పోలీసుగా బాధ్యత స్వీకరించవచ్చును. అప్పుడు వారానికి కనీసం నాలుగు గంటలు అయినా మన స్వంత కారులో పెట్రోలింగ్ చెయ్యాల్సి వుంటుంది. ఒక వైర్లెస్ సెట్ ఇస్తారు. ఏదయినా అనుమానాస్పదంగా  అనిపిస్తే స్టేషనుకి మెసేజ్ ఇస్తే ఆఫీసర్లు వస్తారు.

వారం వారం నా శిక్షణా విశేషాలను మీతో పంచుకుంటాను. కొత్త కొత్త కార్యక్రమాల్లో పాల్గొంటూ కొంగ్రొత్త విషయాలను తెలుసుకుంటూ జీవిత పయనం సాగిస్తుంటేనే  ఉత్సాహంగా వుంటుంది కాదూ?