కామెంటల్ - 1

ఎవరెవరు నాకు కామెంట్లు వేస్తారో, ఎవరెవరికి నేను కామెంట్లు వెయ్యనో చూద్దాం. కొన్ని సార్లు ఇతరుల టపా బాగా నచ్చినా, నచ్చకపోయినా ఆ టపాకి కామెంటేంత కానీ, మెంటేంత కానీ సీనున్నా బద్దకించో, సమయం లేకనో వేయలేము కదా. వారాంతంలో ఇంటి దగ్గరుంటాను కాబట్టి టపాలు చూడగలనే కానీ వ్యాఖ్యానించేంత తీరిక లేదా ఓపిక వుండవు నాకు. అలాంటప్పుడు మంచి టపాలు వచ్చినా నా వ్యాఖ్యలు మిస్సవుతుంటాయవి.

కొంతమంది బ్లాక్ లిస్టుల్లో నా పేరు వుంటుంది. అలాంటి వారు నా బ్లాగులు చూస్తారో లేదో తెలియదు కానీ కామెంట్లు అయితే చచ్చినా వెయ్యరు. నాలాంటి త్రాష్టుడి బ్లాగులో వ్యాఖ్యానిస్తే ఇంకేమన్నా వుందా, మడి కొట్టుకుపోదూ! ఇహ కొంతమంది నామీద కోపం వుండో లేదా అర్ధాంతరంగా కోపం వచ్చో వారి బ్లాక్ లిస్టులో నా పేరు పేర్చి ఆత్మశాంతి పొందుతారు.

అప్పుడప్పుడు నేనేం చేస్తానంటే ఇంకా పాత పగలు ఎందుకులే అని వారి బ్లాగుల్లో ఒకటో రెండో కామెంట్లు వేసి ఆలివ్ ఆకులు ఇచ్చివస్తాను. మళ్ళీ వారు కూడా కామెంట్లు నా బ్లాగులో వేస్తారో లేదో చూస్తాను. వెయ్యకపోతే ఇహ నేను కూడా బిగదీసుకుపోతాను. ఇహ వారెంత మంచి పోస్టు వేసినా నా నుండి అయితే స్పందన వుండదు. కచ్చ అన్నమాట. ఉదాహరణకు ఓ పెద్ద మనిషి అప్పుడప్పుడయినా మంచి రాజకీయ వ్యాసాలు వ్రాస్తుంటారు. ఆ చర్చల్లో పాల్గొనాలని వుంటుంది కానీ కచ్చకొద్దీ పాల్గొనను. అంటే నేను పాల్గొననంత మాత్రాన వారికేదో నష్టమని కాదు గానీ నాకో తుత్తి అంతే.

ఇహ కొన్ని సైట్లు నాలాంటి చారిత్రిక పురుషుడిని వ్యాఖ్యానించకుండా చేయడానికి ఐ పి అడ్రసులు బ్లాక్ చేస్తాయి. ఆ కథా కమీశూ మీకు తెలిసేవుంటుంది ;) ఇహ కొన్ని బ్లాగుల్లో ఎప్పటికీ మనమే వెయ్యాలి కానీ వారు మన బ్లాగుల్లో వెయ్యరు. కొంతమంది వేరే బ్లాగుల్లో కామెంట్లు వేసినా నా బ్లాగులో వెయ్యరు. అలాంటి బ్లాగుల్లో ఒకటి రెండు సార్లు చూసి నేను కూడా కామెంట్లు వెయ్యకుండా ఆత్మ నిగ్రహం పాటిస్తాను. ఇహ మరికొన్ని బ్లాగుల టెంప్లేట్ దరిద్రంగా వుండో లేక వ్యాపార ప్రకటనలు బాగా వుండో వాటి జోలికే వెళ్ళబుద్ధి కాదు - ఇంకా ఏం వ్యాఖ్యానిస్తాం?

ఇక కొందరు ఆడాళ్ళుంటారు. వీళ్లందరూ వృద్ధనారీ పతివ్రతలన్నమాట. వీరి కళ్ళకి నేను మైకేల్ మదన కామరాజులా అనిపిస్తాను కాబట్టి నా జోలికి వారు రారు. కొంతమంది ఆడవారి దృష్టిలో నేను రాముడిలా మంచి బాలుడిని కాదు కాబట్టి నా బ్లాగుల్లో వ్యాఖ్యానిస్తే ఏ ఎయిడ్స్ వైరస్ తమెకెక్కుతుందో అని చదివినా సరే అల్లంత దూరాన వుంటారు - హెందుకయినా మంచిదని. మరి కొంతమంది ఆడ భక్తి బ్లాగర్లు నేను నాస్తికుడిని కాబట్టి నా జోలికే రారు.

కొంతమంది అభ్యుదయ బ్లాగర్లమని అనుకునేవారికి నాదే టైపు అభ్యుదయమో అర్ధం కాక సనాతన అభ్యుదయానికీ, తమ బూజు పట్టిన విప్లవవాదాలకీ సరిపడతానో లేదో అన్న అభిజాత్యంతో లేదా తమ సామాజిక వర్గమో, తమలా అణగారిన వర్గమో కాదన్న నయా అంటరానితానంతో నా బ్లాగులో వ్యాఖ్యానిస్తే నన్ను తాకినట్లయి మైల పడిపోతామని అనుకుంటారు.