Scratch Free పెంపకం!

మేము అప్పుడు కెనడాలో వుండేవారం. మాకు తెలిసిన వారికి కెనడా ఇమ్మిగ్రేషన్ రావడంతో యుఎస్ నుండి కెనడాకి మారారు. ఒకసారి మాటల సందర్భంలో వాళ్ళ యొక్క మూడు నాలుగేళ్ళ బాబుని గురించి ఆ ఇంటామె ఇలా చెప్పింది. "మా బాబుకి కెనడా వచ్చాక వంటి మీద రెండు సార్లు గీతలు పడ్డాయండీ. యు ఎస్ లో స్క్రాచ్ ఫ్రీగా పెరిగాడు". నేను హ అని కళ్ళు తేలవేసినతపని చేసాను. ఇలా పిల్లలని అలా స్క్రాచ్ ఫ్రీగా కూడా పెంచాలనుకునేవారు కూడా వుంటారని నాకు అప్పుడే తెలియడం!

ఇహ మాకు తెలిసిన డాక్టర్ దంపతులు ఒకరు వుండేవారు. వాళ్ళ పిల్లలని ఎంత సున్నితంగా పెంచేవారంటే పిల్లల్ని అస్సలు ఎగరనీయకపోయేవారు, దుమకనీయకపోయేవారు. అలా చేస్తుంటే అదో మహాపరాధంగా చివాట్లేసి కూర్చోబెట్టేవారు. మా పిల్లలు స్వేఛ్ఛగా ఆడుతుంటే ఏంటీ పెంపకం అన్నట్లుగా చూసేవారు.  మా మిత్రుడు ఒకతను అయితే పిల్లలు ఆడుకుంటుంటే ఏంటీ గొడవ అని చిరాకు పడుతుంటాడు. బుద్ధిగా టివి చూస్తూ కూర్చోక ఏంటీ ఆటలు అని విసుక్కునేవాడు. అతను నాకు క్లోజ్ ఫ్రెండ్ కాబట్టి అతని విధానం తప్పని అర్ధం చేయించాను లెండి.  

ఒకసారి మా ఇంటికి ఓ రెండు కుంటుంబాలు వాళ్ళ పిల్లలతొ సహా వచ్చారు. వాళ్ళ పిల్లలు, మా అమ్మాయి కలిసి పిల్లో ఫైటింగు చేయసాగారు. ఏంటీ పిల్లోలతో ఫైటింగు అని ఆ తండ్రులు చిరాకు పడ్డారు. అవును, పిల్లలు కత్తులతో ఆడుకోవాలి గానీ మెత్తలతో ఆడుకోవడం ఏంటీ అని నేను దీర్ఘం తీసాను.

ఇలా పిల్లలని స్వేఛ్ఛగా ఆడుకోనివ్వకుండా, మరీ మరీ హద్దులు చెబుతూ అతి సున్నితంగా పెంచడం ఎప్పటినుండో ఫ్యాషన్ అయినట్లుంది. ఈ అతి సున్నితత్వం స్త్రీలలో ఎక్కువగా గమనిస్తుంటాం. తల్లితండ్రులిద్దరూ అలాంటి వారయితే ఇహ పిల్లలు చచ్చారన్నమాటే. ఇహ హద్దులే హద్దులు. వాటికిక అంతే వుండదు. చాలామందికి తమ తెలివి మీద తమకు కాస్త నమ్మకం కలిగిందంటే చాలు వారికి తెలిసిన జాగ్రత్తలు, మంచివనుకున్న మ్యానర్స్ అన్నీ తమ పిల్లలమీద యధేఛ్ఛగా రుద్దేస్తారు. పాపం చిన్న పిల్లలు అంతగా ఎదురు చెప్పలేరు గనుక వినేస్తారు. తమ పిల్లలు అపర బుద్ధిమంతుల్లా మెలగాలని ఆశిస్తారు కానీ ఆ పిల్లలు కోల్పోతున్న బాల్యాన్ని గుర్తించరు. చాలా క్రమశిక్షణతో పెంచుతున్నామనుకుంటారు కానీ మరో వైపున తమ పిల్లలు కోల్పోతున్నదేమిటో గుర్తించరు. పైగా నాలాంటివారెవరయినా పిల్లలని అర్ధం చేసుకుంటూ వారి బాల్యాన్ని వారికి ఇవ్వజూపుతుంటే గారాబం చేస్తున్నారంటారు.

పిల్లలని ఆడుకోనిద్దాం - అలా ఆడుకోవడం వారి యొక్క హక్కు అని గుర్తిద్దాం. వారి బాల్యాన్ని వారికి ఇచ్చేద్దాం.