బ్లాగోఛ్ఛాటన

ఈమధ్య ఇంటా బయటా నాకు పడనివాళ్ళు ఎక్కువయ్యారు. బయట బ్లా'గులో'ళ్ళ సంగతి చూద్దాం. ఈమధ్య శానా మంది టపాలు టపాటపా రాలుస్తున్నారు. వాళ్ళకు పోటీగా నేను మూడు నాలుగు టపాలు వేసినా నా టపాలు టార్చ్ లైటు వేసి వెతికితే తప్ప కనపడటం లేదు. అందుకే హారం, కూడలిలల్లో పిండి చల్లదలుచుకున్నాను. దానితో ఎక్కడ టపాలు అక్కడ పరార్. మాలికలో కూడా ఆ ఉఛ్ఛాటనా పిండి చల్లాలని వుంది కానీ వాళ్ళు చాలా సహజంగానే విదేశీ కుట్ర అనుకుంటారని ఆ వ్యూహం విరమించుకున్నాను. మన ప్రవీణ్ అగ్రిగేటర్లో చల్లుదామంటే ఇది పిండి నా లేక ఏదయినా బూతు పదార్ధమా అని ఆ పిండి యొక్క ప్రాశస్త్యాన్ని అనుమానిస్తాడేమోనని నా అనుమానమూనూ.

ప్రతి ఒక్క బ్లాగరూ తనొక ఏనుగు అనీ, మిగతా వారిలో కొందరయినా ఊరకుక్కలనీ అనుకుని (అల్ప)సంతోషపడుతుంటారు. అదే సంతోషం నాక్కూడానూ. ఈమధ్య ఊరకుక్కలెక్కువయ్యాయి. అందుకే వాటిమీద ఉఛ్ఛాటనా క్రియ ప్రయోగిస్తే అవన్నీ భౌ భౌ మని పారిపోయి ఏ అప్పి కాలునో, బొప్పి కాలునో పీకకపోతాయా అని నా చిన్ని చిన్ని ఆశ.

ఇహ బ్లాగుల్లో కెలుకుడు ఎక్కువయ్యైందని గోలపెట్టడం ఫ్యాషనయిపోయిందని గోలపెట్టడం ఫ్యాషనయిపోయింది కదా. అందుకే ఆ ఉఛ్ఛాటనా తంత్రం ప్రయోగించి బ్లాగులోకంలోని కెలుకుడంతా రూపు మాపి బ్లాగోస్ఫియరుకి మూలశంక పురుషుడిగానే కాకుండా మూలపురుషుడిగా అవతరించదలుచుకున్నాను. ఎలా వుందీ నా ప్లానూ?

ఇప్పుడు ఆ తంత్రాలు, మంత్రాలు అన్నీ అంత కఠొర దీక్షేలు చేసి నేర్చుకునేంత దృశ్యం నాకు లేదు కాబట్టి ఎవరయినా ఆ ఉఛ్ఛాటనా పిండి ఇండియా నుండి టన్నులకు టనూలకొద్దీ ఎక్స్పోర్ట్ చేస్తే కొద్దిగా బ్లాగుల్లో చల్లి మిగతాదంతా ఒబామాకమ్మేస్తా. అప్పుడు ఒబామా దానిని కొద్దిగా వైటు హౌజులో చల్లి మిగతాది తీసుకెళ్ళి  లాడెన్ను కుమ్మేస్తాడు. అప్పుడు గానీ నాయొక్క ఈ దేశ సేవలకు మెచ్చి నా మెడలో ఓ ప్రెసిడెన్షియల్ మెడల్ వేలాడేస్తారు. అన్నట్టు ఆ పిండి రాగానే మా ఊర్లో వున్న మొగాళ్ళందరి మీద ప్రయోగిస్తా. అప్పుడిక మనమే ఊరికొక్కడు.

అంచేతా ఎవరయినా ఇండియాలో ఆ పిండి ప్రొడ్యూసు చేసే కుటీరపరిశ్రమ మొదలుపెడితే బావుంటుందని నా సలహా. ఆలస్యం ఉఛ్ఛాటనా విషం. త్వరపడండి మరి. మీదే ఆలస్యం. మంచి తరుణం మించిన దొరకదు. శుభం భూయాత్.