700 మీటర్ల లోతున 70 రోజులుగా చిక్కుపడ్డ 33 మంది చిలియన్ మైనర్లు రేపు బయటకి వస్తున్నారోచ్!

దాదాపుగా ఓ 70 రోజుల క్రితం 700 మీటర్ల లోతున 33 మంది చిలియన్ మైనర్లు చిక్కుపడ్డారు. వారి ఆచూకి చిన్న బోరు ద్వారా 17 రోజుల తరువాత పైన ఉన్న వారికి తెలిసింది. అప్పటినుండీ వారిని రక్షించడానికి, పైకి తీసుకురావడానికి  అన్ని ప్రయత్నాలు జరుగుతూవున్నాయి. వారి ఆచూకీ తెలిసిన దగ్గరినుండీ ప్రపంచవ్యాప్తంగా ఇది ప్రముఖవార్తగా వస్తోంది. ఇండియాలో జాతీయ పత్రికలు ఏమయినా ఈ న్యూసును పట్టించుకున్నాయో లేదో గానీ ఇంత ముఖ్యమయిన వార్తను అన్ని రోజులుగానూ ఏ ఒక్క తెలుగు పత్రికా అంతగా పట్టించుకున్నట్లు లేదు. ఏ రోజయినా అరకొర సైడు వార్తగా ఎందులోనయినా వచ్చివుండవచ్చు.  నేనూ ఈ డెవెలప్‌మెంటులను శ్రద్ధగా అనుసరిస్తూ వస్తున్నాను.  

రెండు మూడు సన్నటి బోరు గొట్టాల ద్వారా ఇన్నిరోజులు వారికి ఆహారమూ, మందులూ, ఇతర అవసరమయిన వస్తువులూ సన్నటి కంటెయినర్లలో పెట్టి అందిస్తూ వస్తున్నారు. వారు పట్టేంత చేస్తున్న రంధ్రం మొన్ననే వారిని చేరింది. ఆ హోలులో వున్న మట్టి కూలకుండా ఈ రోజు వరకూ గట్టి చేసారు. వారిని పైకి తీసుకురావడానికి ప్రత్యేకంగా ఒక వెడల్పాటి గొట్టం తయారు చేసారు. దానికి ఫినిక్స్ అని పేరు పెట్టారు. ఇవాళ ట్రయల్ రన్స్ చేస్తే అది చక్కగా కిందికీ పైకీ వెళ్ళొచ్చింది. అందుకే ఇక రేపటినుండీ ఆ మైనర్లను పైకి తీసుకురావడం మొదలుపెడతారు. 

ఈ సంఘటణను ఇన్ని రోజులుగా  ఫాలో చేస్తుంటే ఒక సాహసవంతమయిన రియాలిటీ షో చూస్తున్నట్లుగా వుంది. వారికి తీసురావడానికి చేసిన రంధ్రం ఆ మైనర్లను చేరిందనగానే నాకూ చాలా సంతోషమయ్యింది. మరి ఎవరు ముందుగా బయటకి వస్తారయ్యా అని అడిగితే అందరూ మేము వెనకే వస్తామని త్యాగాలు చేస్తున్నరంట. ఎంత చక్కటి విషయం అది, కదా. ఆ 33 మందీ క్షేమంగా బయటకి వస్తారని ఆశిద్దాము.

క్రింద BBC లింక్ ఇస్తున్నాను. దాని అడుగుకి వెలితే దీనికి సంబంధించిన లింకులు వుంటాయి. వివరాలు తెలుసుకోండి. ఈ చక్కటి వార్తను మీరూ అనుసరించండి.

http://www.bbc.co.uk/news/world-latin-america-11518015