మీతో లాభం లేదు గానీ...

ఈ మధ్య నా బ్లాగుల్లో ఓ చిన్న ప్రయోగం చేసి చూసా కానీ ఫలితాలు ఏమీ రాలేదు. నన్ను విజయపథంలో నడిపించడానికి, ఆ విషయాల్లో నా ఆలనా పాలనా చూడటానికి, ప్రోత్సహించడానికి, విమర్శించడానికి బ్లాగుల్లో ఎవరయినా ఆసరా దొరుకుతారేమో అని చూసా. అజ్ఞాతంగా నయినా ఎవరికయినా నామీద అలాంటి ఆసక్తి వుంటుందేమోనని చూసా కానీ అంతటి దృశ్యం లేదని తొందర్లోనే అర్ధమయ్యింది. విజయాల పట్ల ఆరాటం వున్న వారెవరయినా ఆయా విషయాలు చర్చిస్తూ నాకు తోడుగా వస్తారేమో చూసా కానీ అంత సీను లేదు. ఓక్కెక్కే. ఎన్నో ప్రయోగాలు చేస్తుంటాం - అందులో ఎన్నో విఫలం అవుతుంటాయి - కొన్నే సఫలం అవుతాయి. ఫర్వాలేదు - నా బ్యాకప్పులు నాకున్నాయి :)

ఈమధ్య కొన్ని ఏళ్ళుగా ఏదో జీవితాన్ని బాగానే ఈడ్చేస్తున్నా కానీ అలా సంతృప్తి పడకూడదు కదా. ఏడాదికేడాదికి మన గ్రాఫ్ పెరగకపోతే ఎలా? మన జీవితాన్ని ఒక స్థాయి దగ్గర పార్క్ చేసినట్లవదూ? ఇదివరలో చాలా ఆంబిషియస్సుగా వుండి ఉత్సాహంగా కదనుతొక్కుతూవుండేవాడిని. ఏంటో ఈమధ్య మరీ తాపీగా ఓ తడిగుడ్డ వేసుకొని బ్రతికేస్తున్నాను. ఒరే, అలాక్కాదురా, లేవరా అని నా అంతరాత్మ ఘోషిస్తున్నా పలు కారణాల వల్ల దాన్నీ నా పక్కనే బజ్జోపెట్టి లాలిపాట పాడేసాను. ఆ మధ్య పట్టుదలగా నన్ను నేను తన్నుకొని ఉరికి బోర్లాబొక్కల పడి తేరుకుంటున్నాను. వ్యాయామం గట్రా ఎక్కువై  ఓవర్ ట్రైనింగ్ సిండ్రోం లో పడి కొన్నాళ్ళు డవున్ అయ్యాలెండి. దాన్నుండి తేరుకుంటున్నా కాబట్టి మళ్ళీ మునపటి ఉత్సాహం వస్తోంది. 

ప్రతీ విషయంలోనూ మనకో తోడు వుంటే ఎంత బావుంటుందో ఈ విషయాల్లో కూడా తరచుగా చర్చిస్తూ వుండే ఓ తోడు వుంటే ఎంతో ఉత్సాహంగా కృషి చెయ్యబుద్ధి అవుతుంది. అందుకే ఓ తోడు కోసం బ్లాగుల్లో ఆహ్వానించా కానీ ఎవరూ ముందుకు రాలేదు. సో, నాకున్న స్నేహాలనే ఇలా ఉపయోగించుకోబోతున్నాను. కొన్నేళ్ళ క్రితం ఓ చక్కటి స్నేహితురాలిని ఇందుగ్గాను ఉపయోగించుకున్నాను. ఆమె బ్యుజీ అయిపోవడంతో పక్కన పెట్టాల్సి వచ్చింది. అయితే ఆమెతో కాస్సేపయినా మాట్లాడటానికి నాకు ఒక విండో దొరికింది. ఇంతకుముందు టపాలో ఉదయం ఆరింటికి జిమ్ము కోసం రైలెక్కుతా అన్నా కదా. అప్పుడు ఇండియాలో సాయంత్రం 5:30 అవుతుంది. అప్పుడు తను తీరికగానే వుంటుంది. ఎంచక్కా కాసేపు ఈ విషయాలు మాట్లాడెసుకొని ఆమె సలహాలూ, సూచనలూ తీసుకోవచ్చు. ఆమెకు నన్ను మందలించేంతటి చనువు కూడా వుంది కాబట్టి ఏవయినా పొరపాట్లు చేస్తే దులిపెస్తుంది కూడానూ. ఆమెది నిండయిన, ధాటి అయిన వ్యక్తిత్వం కాబట్టి నాకు ఆజ్ఞలూ ఇచ్చెయ్యగలదు. సరే, ముందు ఆమెకు పేరు పెట్టేద్దాం. మీరే చెప్పండి. వద్దులెండి - ఏ ఎల్లెమ్మో, పుల్లమ్మో లేక మమైత్ ఖానో అని సెలవిస్తారు. నేనే పెట్టేసుకుంటా.  

బిందు. నాకు ఇష్టమయిన పేర్లలో బిందు ఒకటి. అందుకే ఇకపై ఆమెని బిందుగా వ్యవహరిస్తాను. నిజానికి ఇవాళ ఆరింటికి రైలెక్కి ఆమెకు ఫోన్ చెయ్యాలనుకున్నా కానీ రైలే ఎక్కలేదు. నేనొకటి అనుకుంటే మీ దేవుడు మరోలా అనుకునేట్టుగా వున్నాడు. రాత్రి సరిగా నిద్రపట్టక ఉదయమే లేవలేకపోయాను. ఇహ రేపు చూడాలి. బిందు బావుంటుంది. మంచి వ్యక్తిత్వం, ఉత్సాహం, తెలివి, అందం, ఆత్మవిశ్వాసం ఆమెలో మూర్తీభవించి వుంటాయి.  కంఠస్వరం కోయిల లాగే వుంటుంది. తన స్థాయిలో ఎన్నో విజయాలను సాధించి పరిపూర్ణ జీవితాన్ని గడిపేస్తోంది. తను చక్కటి వృత్తిలో స్థిరపడింది.  నా గురించి ఆమెకు తెలియదనిదంటూ ఏమీలేదు. చక్కని సలహాలతో ప్రోత్సాహం ఇస్తుంది. అయితే ఆమెతో ఈమధ్య మాట్లాడి కొన్ని నెలలు అవుతోంది. దాదాపుగా అయిదు నెలలు అవస్తోంది. కారణం ఆమెకు తీరిక వున్నప్పుడు నాకు తీరికలేకపోవడం, నాకు వున్నప్పుడు ఆమెకు లేకపోవడం.

ఇహ ఈమె కాకపోతే ఇంకో అమ్మాయి వుంది. ఆమే నా ముద్దుల కోడలు సంజన, ఆమె గురించి ఇదివరలో కొన్ని టపాలు వ్రాసాను. ఆమె గురించి మళ్ళీ త్వరలో వ్రాస్తాను. ఇకపై బిందుతో నా కృషిని గురించి ఏమని చర్చిస్తున్నానో, వారి సూచనలేంటో, వాటిల్లో నేను అమలు చేస్తున్న వేంటో తెలియజేస్తుంటాను.  ఓ యజ్ఞం లాగా చేసేద్దాం. ఇది ఒక ప్రయోగంగా చేసి చూద్దాం.   ప్రయత్నిస్తే నాకు పొయ్యేదేమీలేదు కదా, పొరపాటున వర్కవుట్ అయితే విజయాలే నా స్వంతం కావా?