సమ్మసమ్మగా సకల జనుల సమ్మె

అయిదేళ్ళ క్రితం ఇండియా వెళ్ళినప్పుడు ఒకసారి సూర్యాపేట నుండి హైదరాబాద్ వస్తున్నాను. మధ్యలో నకిరేకల్లులో అనుకుంటా సిపిఐ వాళ్ళో సిపిఎం వాళ్ళో ఎందుకో ఒకందుకు రాస్తా రోకో చేసి (వాళ్ళకు అవి రోటీన్ పనులు కదా) మూడు గంటల పాటు బైఠాయించారు. కొన్నేళ్ళుగా కెనడా, యు ఎస్ లలో వుంటూ వస్తున్న నాకు  అలా చిక్కు పడిపోవడం చాలా అసహనంగా, చిరాగ్గా అనిపించింది.  ఇక్కడ ట్రాఫిక్ జాములు వుండవని కాదు కానీ రాస్తారోకోలు వుండవు కదా. నాకు ఒక్కసారికే అలా అనిపిస్తే రోజూ హర్తాళ్ళూ, సమ్మెల్లూ, రాస్తారోకోలతో జనాలకి ఎలా వుంటుందో ఏమో. 

అందుకే ఇండియాకు ఎవరికయినా ఫోను చేసినప్పుడల్లా సమ్మె ఎలా నడుస్తోందని అడుగుతూవుంటా. నేను ఎక్కువగా హైదరాబాదు వారికే చేస్తుంటాను. అలా వారియొక్క ఇబ్బందులు తెలుస్తుంటాయి.  ముఖ్యంగా కరెంట్ కష్టాలు చెబుతూవుంటారు. ఈ ఇబ్బందుల వల్ల మరి సమ్మెను వ్యతిరేకిస్తున్నారా, సమర్ధిస్తున్నారా లేక ఇంకా సమ్మె ఇంకా తీవ్రంగా వుండాలనుకుంటున్నారా అని అడుగుదామనుకుంటూనే మరచిపోతూవున్నా. తెలుసుకోవాలి.

ఈ సమ్మెలో అమ్మ గురించే ఆందోళన. ఒక్కతి ఈ ఇబ్బందుల్లో ఎలా నెట్టుకొస్తోందో అని ఆదుర్దాగా వుంటుంది. ఆమెకు చేదోడు వాదోడుగా తోబుట్టువులూ, మా బంధుమిత్రులు వున్నారనుకోండి. అయినా సరే. ఇవాళ ఫోన్ చేసి సమ్మె వల్ల ఏమయినా ఇబ్బందులు పడుతున్నావా అని అడిగాను. ఏమీ లేదని చెప్పింది. పెన్షన్ వచ్చిందా అని అడిగాను. రేపు మాపు అని తిప్పించుకుంటున్నారని చెప్పింది. అమ్మకి డబ్బు కోసం మరీ అర్జెంటేమీ లేదనుకోండి  కానీ ఇతరులు ఎంతోమంది వృద్ధాప్యంలో పెన్షన్ల మీదే ఆధారపడివుంటారు కదా.

అయితే ఈ సమ్మె ఎవరికి సమ్మగా వుంటొందనేది నాకు అర్ధం కావడం లేదు. చిన్నప్పుడు మన పగవాడికి ఎవడికయినా దెబ్బలు తగిలితేనో, క్రిందపడిపోతేనో, తిట్లు పడితేనో సమ్మ సమ్మ అని సంకలు కొట్టుకునేవారం.  ఇప్పుడు ఈ సమ్మ వల్ల ఆంద్రా వారు కూడా ఇబ్బందులు పడుతున్నారని, తమ ప్రతాపం చూపిస్తున్నామని తెలంగాణా ఉద్యమకారులు చంకలు కొట్టుకుటున్నారా లేక ఇన్నాళ్ళుగా అవస్థలు పడి సమ్మె చేస్తున్నా ఇంకా వర్కవుట్ అవడం లేదు అని సమైక్యాంధ్రా వారు చంకలు కొట్టుకుంటున్నారా  అనేది తెలియకుండా వుంది.

ఎవరు కొట్టుకున్నా కొట్టుకోకున్నా ఒకతను మాత్రం మననందిరినీ చూసి చంకలు కొట్టుకుంటున్నాడనే అనుకుంటాను. అతనే సిలిపి సిదంబరం. సిచ్చు పెట్టేసాడుగా, సంకలూ కొట్టుకుంటాడు మరి. 

ఇకనైనా సమ్మె ఆగితే బావుండు అని సామాన్య ప్రజలు అనుకుంటున్నారా లేక సమస్యా పరిష్కారం కోసం ఇంకా తీవ్రం కావాలంటున్నారా అనేది నాకు అర్ధం కాకుండా వుంది. పేపర్లు చూస్తే నాయకుల సవాళ్ళే తప్ప సామాన్య తెలంగాణా జనం యొక్క జపం తెలియదాయే. అందుకే తెలంగాణాలో వుంటూ సమ్మె వల్ల అవస్థపడుతున్న జనం యొక్క గళం అది మీది అయినా లేదా మీకు ఏమయినా తెలిసినా చెప్పెయ్యండేం.