స్వైన్ ఫ్లూ గురించి ఇండియాలో అంత కంగారు ఎందుకు?

స్వైన్ ఫ్లూ గురించి ఇండియాలో పడుతున్న కంగారు చూస్తుంటే నవ్వు వస్తోంది. ఇది సాధారణ ఫ్లూ కంటె తక్కువ భయంకరం అయినప్పుడు, సాధారణ ఫ్లూ కంటె తక్కువ మరణాలు సంభవిస్తున్నప్పుడు దీని గురించి మరీ అంత కంగాళీ, కంగారు ఎందుకు?

మొదట్లో మెక్సికోలో ఇది ప్రారంభమయినప్పుడు అక్కడి ప్రభుత్వం తప్పు లెక్కలు కట్టి మరణాలు విపరీతంగా ప్రకటించినప్పుడు ఇక్కడ కూడా అందరం కంగారు పడ్డాము. ఆ తరువాత ఆ లెక్కలు సవరించి ఈ ఫ్లూకి అంత దృశ్యం లేదని తేటతెల్లమయిన తరువాత దాని గురించి ఖంగారు పడటం మానివేసాం. ఏదో సాధారణ జాగ్రత్తలు తప్పితే నోటికీ,ముక్కుకీ గుడ్డలు కట్టుకొని ఎవరూ కనిపించరు ఇక్కడ. పబ్లిక్ ప్లేసులూ, పాఠశాలలూ మూసివేయరిక్కడ.

ఇదివరకు పాశ్చాత్యదేశస్తులే కంగారు మనుషులు, భయస్థులు, చిన్న విషయానికే పెద్దదిచేస్తారు అనుకునేవాడిని. ఇప్పుడు టివీ ఛానళ్ళు/ న్యూస్ ఏంకర్లు/పత్రికలు మొదలయిన వారి మితిమీరిన హడావిడితో భారత ప్రజలను వణికిస్తూ ప్రజలని పారనాయిడ్ లుగా చేసేస్తున్నారు.

ఇదే విధమయిన అభిప్రాయాలతో BBC లో ఒక విశ్లేషణ వచ్చింది చూడండి.
http://www.bbc.co.uk/blogs/thereporters/soutikbiswas/2009/08/the_swine_flu_vibe.html

దయచేసి ఇండియా బ్లాగర్లయినా ఇది గుర్తించి ఈ మితిమీరిన ధోరణిని తగ్గించేలా ఇతరులను ఎడ్యుకేట్ చేయాల్సిందిగా కోరుతున్నాను. అంతేగాని అవాస్తవ వార్తా ప్రవాహాలలో కొట్టుకుపోతూ మీరు కూడా ఈ అనవసరపు ఆందోళనలను పెంచేలా టపాలు వ్రాయవద్దని, హిస్టీరియా పెంచవద్దని నా విజ్ఞప్తి.

స్వైన్ ఫ్లూ గురించి నా సూచన ఇది: సాధారణ ఫ్లూ రాకుండా ఎలా జాగ్రత్తపడాలో అలా జాగ్రత్త పడండి. చాలు.